اسلام آباد: نیشنل سائبر کرائم انویسٹی گیشن ایجنسی (این سی سی آئی اے) نے شہریوں کو مفت اور عوامی وائی فائی نیٹ ورکس استعمال کرتے وقت احتیاط برتنے کی ہدایت کرتے ہوئے خبردار کیا ہے کہ غیر محفوظ نیٹ ورکس کے ذریعے ذاتی معلومات اور آن لائن ڈیٹا سائبر جرائم پیشہ عناصر کے ہاتھ لگ سکتا ہے۔
این سی سی آئی اے کی جانب سے سماجی رابطے کی ویب سائٹ ایکس پر جاری ویڈیو پیغام میں شہریوں کو مشورہ دیا گیا ہے کہ وہ عوامی یا مفت وائی فائی استعمال کرتے ہوئے آن لائن بینکنگ، بینک اکاؤنٹس سے لین دین اور آن لائن خریداری سے گریز کریں، خصوصاً اس وقت جب متعلقہ نیٹ ورک کی سکیورٹی اور اصلیت کی تصدیق نہ ہو سکے۔
نامعلوم وائی فائی نیٹ ورکس سے محتاط رہنے کی ہدایت
این سی سی آئی اے نے خبردار کیا ہے کہ کسی وائی فائی نیٹ ورک کا نام کسی معروف ادارے، دفتر، کیفے یا ہوائی اڈے سے ملتا جلتا ہونے کا مطلب یہ نہیں کہ وہ قابلِ اعتماد بھی ہے۔
سائبر جرائم پیشہ عناصر بعض اوقات معروف مقامات یا اداروں سے مشابہت رکھنے والے ناموں کے ذریعے جعلی وائی فائی نیٹ ورکس قائم کرتے ہیں، تاکہ صارفین کو ان سے منسلک کرکے ان کی ذاتی معلومات تک رسائی حاصل کرنے کی کوشش کی جا سکے۔
یہ بھی پڑھیں: وائی فائی کی اسپیڈ تیز کرنے کے 5 آسان اور آزمودہ طریقے
مفت وائی فائی استعمال کرتے وقت کیا احتیاط کریں؟
شہریوں کو ہدایت کی جاتی ہے کہ عوامی وائی فائی سے منسلک ہونے سے پہلے نیٹ ورک کی اصلیت کی تصدیق کریں اور حساس معلومات کے تحفظ کے لیے ضروری اقدامات اختیار کریں۔
غیر محفوظ عوامی وائی فائی پر آن لائن بینکنگ اور مالی لین دین سے گریز کریں۔
نامعلوم نیٹ ورکس کے ذریعے آن لائن خریداری نہ کریں۔
پاس ورڈز، بینک اکاؤنٹ کی تفصیلات اور دیگر حساس معلومات کے تحفظ کو ترجیح دیں۔
اپنے موبائل فون اور دیگر آلات کے سافٹ ویئر کو اپ ڈیٹ رکھیں۔
جہاں ممکن ہو، حساس کاموں کے لیے موبائل ڈیٹا یا قابلِ اعتماد محفوظ نیٹ ورک استعمال کریں۔
شہریوں کے لیے اہم پیغام
مفت وائی فائی سہولت بظاہر آسان اور مفید ضرور ہے، تاہم غیر محفوظ نیٹ ورک کا استعمال ڈیجیٹل سکیورٹی کے لیے خطرہ بن سکتا ہے۔ شہریوں کو چاہیے کہ کسی بھی عوامی وائی فائی نیٹ ورک سے منسلک ہونے سے پہلے اس کی تصدیق کریں اور اپنی ذاتی معلومات، مالی تفصیلات اور آن لائن اکاؤنٹس کے تحفظ کے لیے احتیاطی تدابیر اختیار کریں۔
