اسرائیلی پارلیمنٹ میں حلف برداری کی تقریب آج ہو گی، نیتن یاہو کے اقتدار کو خطرہ
اسرائیلی صدر آئزک ہرزوگ پارلیمنٹ کی حلف برداری کی تقریب سے خطاب کریں گے
-
ویب ڈیسک -
November 10, 2026
اسرائیل کی نئی پارلیمنٹ آج حلف اٹھائے گی، تاہم 120 نشستوں پر مشتمل پارلیمنٹ میں کسی بھی سیاسی اتحاد کو واضح اکثریت حاصل نہیں ہوسکی، جس کے باعث وزیراعظم بن یامین نیتن یاہو کو اقتدار برقرار رکھنے کے لیے مشکلات کا سامنا ہے، جبکہ ان کے سیاسی حریف ایزن کوٹ نئی حکومت بنانے کی کوششوں میں مصروف ہیں۔
رپورٹس کے مطابق اسرائیلی صدر آئزک ہرزوگ پارلیمنٹ کی حلف برداری کی تقریب سے خطاب کریں گے۔ صدر نے ایزن کوٹ کو حکومت تشکیل دینے کے لیے 28 روز کا مینڈیٹ دے رکھا ہے۔
پارلیمنٹ کے افتتاحی اجلاس سے قبل ایزن کوٹ کی جماعت یشار پارٹی نے اہم پارلیمانی عہدوں کے لیے نامزدگیوں کا اعلان بھی کردیا ہے۔ پارٹی کے مطابق متان کہانا کو پارلیمنٹ کے اسپیکر کے عہدے کے لیے نامزد کیا جائے گا، جبکہ ایوگڈور لائبرمین کو خارجہ اور دفاعی کمیٹی کی سربراہی دینے کی تجویز ہے۔
اسرائیل میں نئی حکومت کے قیام کے لیے 120 رکنی پارلیمنٹ میں کم از کم 61 ارکان کی حمایت درکار ہوگی، تاہم ایزن کوٹ کے بنیادی اپوزیشن بلاک کے پاس فی الحال صرف 48 نشستیں ہیں، جو نیتن یاہو کے سیاسی اتحاد سے بھی کم ہیں۔
سیاسی تجزیوں کے مطابق ایزن کوٹ کو عرب اسرائیلی ارکان پارلیمنٹ کی حمایت حاصل ہونے کی صورت میں حکومت سازی کے لیے مطلوبہ اکثریت مل سکتی ہے۔ 19 عرب اسرائیلی ارکان کی حمایت یا حکومت میں شمولیت ان کے لیے فیصلہ کن ثابت ہوسکتی ہے۔
دوسری جانب 13 نشستوں کی حامل دو الٹرا آرتھوڈوکس جماعتوں کی نیتن یاہو سے علیحدگی بھی سیاسی صورتحال تبدیل کرسکتی ہے اور ایزن کوٹ کے لیے اقتدار تک پہنچنے کی راہ ہموار کرسکتی ہے۔
اسرائیلی پارلیمنٹ کی نئی مدت کے آغاز کے ساتھ حکومت سازی کی کشمکش بھی تیز ہوگئی ہے، جبکہ نیتن یاہو کے سیاسی مستقبل اور ایزن کوٹ کی ممکنہ کامیابی کا انحصار آئندہ دنوں میں اتحادیوں کی حمایت پر ہوگا۔
