شہریار منور پہلے سے زیادہ خوبصورت نظر آنے لگے؛ واقعی سرجری کروا لی؟
ڈاکٹر نے شہریار منور کی کاسمیٹک سرجری کا امکان ظاہر کردیا
-
ویب ڈیسک -
November 2, 2026
پاکستان کے معروف اداکار شہریار منور ان دنوں اپنی اداکاری کے ساتھ ساتھ شخصیت میں مبینہ تبدیلیوں کے باعث بھی سوشل میڈیا پر توجہ کا مرکز بنے ہوئے ہیں جہاں ایک ماہر ڈاکٹر نے ان کے چہرے میں ممکنہ کاسمیٹک تبدیلیوں سے متعلق تبصرہ کیا ہے۔
نجی ٹی وی چینل پر نشر ہونے والے نئے پاکستانی ڈرامے میں ابوبکر کا کردار ادا کرنے والے شہریار منور کو ان کی اداکاری اور دلکش شخصیت کے باعث مداحوں کی جانب سے سراہا جا رہا ہے۔
حال ہی میں ایستھیٹک فزیشن ڈاکٹر عمارہ سعد ہاشمی نے اپنے انسٹاگرام اکاؤنٹ پر اداکار کی پرانی اور حالیہ تصاویر کا موازنہ کرتے ہوئے ان کی ظاہری شخصیت میں آنے والی تبدیلیوں پر گفتگو کی۔
ڈاکٹر عمارہ سعد ہاشمی نے شہریار منور کی ناک کی ممکنہ سرجری اور چہرے پر فلرز کے استعمال کا امکان ظاہر کیا جبکہ ان کی موجودہ شخصیت کو بھی سراہا۔
اس ویڈیو کے سامنے آنے کے بعد سوشل میڈیا صارفین نے مختلف تبصرے کیے۔ بعض صارفین کا کہنا تھا کہ شہریار منور پہلے سے زیادہ خوبصورت دکھائی دیتے ہیں جبکہ کچھ نے ان کی ظاہری شخصیت کے بجائے اداکاری کو زیادہ اہم قرار دیا۔
دوسری جانب بعض صارفین نے چہرے میں نظر آنے والی تبدیلیوں کو عمر بڑھنے کے ساتھ آنے والی قدرتی تبدیلیوں کا نتیجہ قرار دیا۔
واضح رہے کہ شہریار منور کی جانب سے تاحال کسی کاسمیٹک سرجری یا چہرے پر فلرز کے استعمال کی تصدیق نہیں کی گئی۔
