ٹرمپ غیرقانونی تارکینِ وطن کو قانونی حیثیت دینے کیلئے ڈیموکریٹس سے مذاکرات پر آمادہ
ڈیموکریٹس کے ساتھ تعاون کے سوال پر ٹرمپ نے امیگریشن کے معاملے پر سمجھوتے کو ممکن قرار دیا
-
ویب ڈیسک -
November 9, 2026
امریکی صدر ڈونلڈ ٹرمپ نے غیر قانونی تارکینِ وطن کو قانونی حیثیت دینے کے لیے ڈیموکریٹس سے مذاکرات پر آمادگی کا اظہار کردیا۔
ڈونلڈ ٹرمپ نے بعض غیر دستاویزی تارکینِ وطن کو امریکا میں قانونی طور پر رہنے کی اجازت دینے کے لیے ڈیموکریٹس کے ساتھ ممکنہ معاہدے پر آمادگی ظاہر کی ہے تاہم انہوں نے اس حوالے سے کسی باقاعدہ منصوبے یا نئی پالیسی کا اعلان نہیں کیا۔
8 نومبر کو نشر ہونے والے سی بی ایس کے پروگرام ’’سکسٹی منٹس‘‘ میں ٹرمپ نے تسلیم کیا کہ ہو سکتا ہے ملک بدری کی کارروائیوں میں ضرورت سے زیادہ سختی نے مڈٹرم انتخابات میں ری پبلکن پارٹی کو سیاسی نقصان پہنچایا ہو۔
صدر ٹرمپ نے کہا کہ خطرناک مجرموں کے خلاف کارروائی اور ایسے افراد کی ملک بدری میں فرق ہونا چاہیے جو برسوں سے امریکا میں ملازمت کر رہے ہیں۔
انہوں نے ہوٹلوں، ریستورانوں، صفائی اور باغبانی کے شعبوں میں کام کرنے والے تارکینِ وطن کا حوالہ دیتے ہوئے ان کی بے دخلی کو ایک مشکل معاملہ قرار دیا۔
ڈیموکریٹس کے ساتھ تعاون کے سوال پر ٹرمپ نے امیگریشن کے معاملے پر سمجھوتے کو ممکن قرار دیا لیکن یہ واضح نہیں کیا کہ کن افراد کو قانونی حیثیت مل سکتی ہے، اس کی شرائط کیا ہوں گی اور ممکنہ معاہدے پر کب عمل ہوگا۔
دوسری جانب سخت امیگریشن پالیسیوں کے اہم معمار اسٹیفن ملر کو وائٹ ہاؤس کا چیف آف اسٹاف مقرر کرنے کے فیصلے نے ممکنہ نرمی کے بارے میں سوالات پیدا کیے ہیں۔ سینیٹ کے ڈیموکریٹ رہنما چک شومر نے بھی اس تقرری کو تنقید کا نشانہ بنایا۔
تاحال کسی معاہدے، عام معافی یا قانونی حیثیت کے لیے درخواستیں وصول کرنے کے پروگرام کا اعلان نہیں ہوا۔ صدر کا بیان فی الحال مذاکرات پر آمادگی کا اظہار ہے۔
