کراچی میں شام اور رات کو لوڈشیڈنگ کا امکان، کے الیکٹرک نے خبردار کردیا
کے الیکٹرک کے مطابق لوڈ مینجمنٹ ناگزیر ہونے کی صورت میں ہی شام اور رات کے پیک آورز میں کی جائے گی
-
ویب ڈیسک -
October 9, 2026
آر ایل این جی کی فراہمی میں رکاوٹ کے باعث کراچی میں شام اور رات کے اوقات میں لوڈ مینجمنٹ کا امکان ہے تاہم دن کے اوقات میں بجلی کی فراہمی مستحکم رہے گی۔
ترجمان کے الیکٹرک کے مطابق آر ایل این جی کی فراہمی متاثر ہونے سے ملک بھر میں بجلی کی پیداوار پر اثر پڑ رہا ہے، جس کے باعث بجلی کی فراہمی میں مشکلات کا سامنا ہے۔
ترجمان نے بتایا کہ کے الیکٹرک کا پاکستان ایل این جی لمیٹڈ (پی ایل ایل) اور متعلقہ حکام سے مسلسل رابطہ ہے، جبکہ بجلی کی صورتحال جلد معمول پر لانے کے لیے تمام ممکنہ کوششیں جاری ہیں۔
کے الیکٹرک کے مطابق لوڈ مینجمنٹ ناگزیر ہونے کی صورت میں ہی شام اور رات کے پیک آورز میں کی جائے گی۔ ادارے نے ممکنہ لوڈ مینجمنٹ پر صارفین سے معذرت کرتے ہوئے کہا ہے کہ دن کے اوقات میں بجلی کی فراہمی مستحکم رکھنے کی کوشش کی جائے گی۔
