پاکستان ٹیسٹ ٹیم میں نئے کھلاڑیوں کی شمولیت، مائیک ہیسن نے مستقبل کا پلان بتا دیا
اگلے ایک سال کے دوران ٹیسٹ ٹیم کے لیے بہترین آپشنز تیار کرنا ہیں، ہیڈ کوچ
-
افضال عباسی -
November 8, 2026
پاکستان کرکٹ ٹیم کے ہیڈ کوچ مائیک ہیسن نے ٹیسٹ اسکواڈ میں شامل نئے کھلاڑیوں کی صلاحیتوں پر اعتماد کا اظہار کرتے ہوئے کہا ہے کہ نوجوان کرکٹرز کے پاس اپنی کارکردگی سے جگہ بنانے اور ٹیسٹ کرکٹ کا تجربہ حاصل کرنے کا بہترین موقع ہے۔
پی سی بی ڈیجیٹل سے گفتگو کرتے ہوئے مائیک ہیسن نے کہا کہ طیب عارف نے پریذیڈنٹ ٹرافی گریڈ ون میں بہت اچھی کارکردگی کا مظاہرہ کیا، جبکہ محمد طحہ ٹاپ آرڈر کے بلے باز ہیں اور گزشتہ دو ڈومیسٹک سیزنز میں ان کی فارم بھی اچھی رہی ہے۔
انہوں نے کہا کہ سمیر منہاس بہترین ٹیلنٹ کے مالک ہیں اور ٹاپ آرڈر میں کسی بھی پوزیشن پر بیٹنگ کرنے کی صلاحیت رکھتے ہیں۔ محمد سلیمان مڈل آرڈر کے کھلاڑی ہیں اور اسپن بولنگ کو بہت اچھا کھیلتے ہیں۔
ہیڈ کوچ کا کہنا تھا کہ ثاقب خان ڈومیسٹک کرکٹ کے تجربہ کار اور بہترین کارکردگی دکھانے والے بولر ہیں، وہ ریڈ بال کرکٹ میں طویل اسپیلز کرانے کی صلاحیت رکھتے ہیں۔
مائیک ہیسن نے علی شبیر کی صلاحیتوں کا ذکر کرتے ہوئے کہا کہ وہ ایکسپریس فاسٹ بولر ہیں، وکٹیں لینے کے لیے حریف بلے بازوں پر حملہ کرنے کے ساتھ اچھی شارٹ پچ بولنگ بھی کروا سکتے ہیں۔
ان کا کہنا تھا کہ اگلے ایک سال کے دوران ٹیسٹ ٹیم کے لیے بہترین آپشنز تیار کرنا ہیں۔ نوجوان کھلاڑیوں کے پاس سیکھنے اور اپنی صلاحیتیں منوانے کا بہترین موقع ہے، جن کھلاڑیوں کو میدان میں اترنے کا موقع ملے گا وہ ٹیسٹ کرکٹ کا قیمتی تجربہ حاصل کریں گے۔
